لحظة لحظة
دقيقة دقيقة
ذنقة ذنقة
تمر الساعات المغرقات العميـــقة
وها هي الساعة تعلن بدقاتها المتأنية التي يختلف إيقاعها تمام الإختلاف عن إيقاع دقات قلبي المتسارعة
أنها الثانية عشر مساءاً بتوقيت ساعة بيتنا
إيه
بتقولوا إيه
12 ... 12
بجـــــــد
لء لء لــــــــــــءءءء
مش معقـــــــول
أنا بنهار بنهار بنهــــــــــــــار "لء مش علي طريقة طنط عفاف شعيب"
النهاردة يا أصدقائي الأعزاء يوم تاريخي بكل المقاييس
يوم مهم وفاصل لن يتكرر مثله أبداً في تاريخ البشرية
يوم من العلامات البارزة في حياة الشعوب جمعاء
باختصار كده ومن غير رغي ولات وعجن كتير
النهاردة
يوم
يوم
مش قادرة أقولها
ولا لساني عايزيطلعها
قلبي مش جايبني أنطقها خالص
إيه بتقولوا أخلص
حاضر
النهاردة يا أحبائي
اليوم المشهود أنه يوم
))) عيد ميــــلادي(((
نعم
إيه ؟؟؟
بتقولوا إيه ؟؟؟
مش سامعة
يووووه (جاء بمختار الصحاح أن يوه هي كلمة إسكندراني غير أبيحه بالمرة، دائماً ما تترد بأستمرار علي ألسنه ساكني مطروح يووووه إسكندرية تستعمل للدلالالة علي حالة الأستنكار)
طب خلاص خلاص متزقوش كده سمعت والكلمة خرمت صرصور ودني من غير السيخ المحمي (وأنتوا يا حسرة هتجيبوا السيخ من فين ما أنكل عــز بيصيف فى طرة لاند السنادي وشكلة مطول كذا صيفيه)
بتسألـــوا
الكام ؟؟؟
طب وليه الأسئلة البايخة دي بأااااه ؟؟؟
إحنا بقي بينا نوعية الأسئلة دي !!!
عموما انتوا مش أغراب
وأي حد لئيم شوية وخبيث حبتين هيرجع يبص ع البروفايل وهيعرف
ده غير اللي متابعين أصلاً وحافظين
النهاية وأمري الي الله
النهاردة ومع الأسف والألم والحزن والأسي .... ومش عارفة ايه كمان
عيد ميلادي السادس والعشرين
ولذلك أنعي إليكم بمزيج من الأسى و الحزن عامي الخامس والعشرين اللي إنتهى إمبارح، ونفتكره طبعا بكل خير، كان عزيز عليا قوي واللهي إهيء إهيء آآآه ... إهيء إهيء عااااا.
ولأن بلوغي هذا السن من أهم أحداث عام 2011م، بعد مرور 24 ساعة علي خطاب عصام شرف التاني، وأبان الأعلان عن فرار مليون مشترك من شبكة الست أم نبيل على طول، وأعقاب ظهور صوباع اللواء الفنجري في خطابه الشهير، كما أن الــ 25دي نمرة بركة ومميز جدا في حياة أي بنت مصرية أصيلة النيل رواها والخير جواها، فهي النمرة التي لها دلالاتها ومضومنها وشموخها وصمودها، ومن أهمها ان خلاص العداد قرب يكر زي بكرة الخيط في ماكنة الخياطة، ويشطب بدري بدري، وإحنا بنلعب في الوقت بدل الضايع، ونبدأ نستعد لعتبه الـ 30، اللي جايه جاية، وكلها 4 سنين، وطبعاً البنات كلهم عارفين أنها عاتبة جزاز وسلمها كله نايلو × نايلو، وان واي.
وعليه فقد قررت نسف حمامي القديم، وتركيب نظام سباكة جديد، إيه مالكم مستغربين ليه، غريبة أوي يعني، مش قولنا 2011، يعني قرارات ثورية من اللي مصدعين دماغنا بيها في برامج التوك توك شوز الليلية بتاعتنا، يعني هـ أقف في صالة بيت العز يا بيتنا ورافعة يافضة مكتوب عليها "مع عيدي السادس والعشرين مش هتقدر تغمض عنيك" مع الأعتزار للست بـاتـا زرقان.
فأنتظروني مع قرارتي الثورية
وربنا يستر ومتطلعش في الأخر مهلبية
ودلوقتي أقول لنفسي
